شاعر شاب في الثالث والعشرين من عمره ، شق طريقه بقصائد تعبر عن أحاسيس وتصور جمال الدواخل ورقة الوجدان والنفس، وعبر عن الوطن وصورها باللغة الأم ، ولقد كتب قصائد متنوعة حملت جمال الصور الشعرية المختزلة للإحساس، الشاعر ( الطاهر محمد احمد التاي)الذي كان لـ( حدقات نيوز ) حوار معه فكانت البداية ..نبذة مختصرة عن الشاعر الطاهر احمد التاي ؟
-بعد التحيه والسلام الطاهر محمد احمد التاي من مواليد منطقة ودالركين بشرق سنار تلقيت تعليم الأساس و الثانوي بود الركين ثم التحقت بجامعة الزعيم الآزهري كلية الإقتصاد، قسم المحاسبة (المستوى الثالث)بإذن الله ضربة البدايه من حوالى سنتين ونصف السنه
* كيف امتطيت صهوة الشعر؟
-لحبي الكبير ليه ولقيتو منفس لكل الكلام والآحاسيس ال ما ممكن تتقال إلا عن طريق كتابة الشعر ونعم الآنيس
*هل تكتب القصيدة العمودية ام النثرية ام الدوبيت وأيهما اقرب لك ؟
-١. القصيده العموميه
-2. الدوليت وبحب العموديه وبجد نفسي فيها مع كل احترامى لفن الدوبيت ذاك الموروث الشعبي العظيم وأن هناك ضروب لابد فيها من الدوبيت مثل ،الفخر
* بمن تأثرت بالشعر؟
-لا أجد نفسي في شاعر معين بحب كل من محمد الحسن سالم(حميد) له الرحمه والمغفره وحبه للوطن سمراءنا روضه الحاج لسلاسة وبلاغة مفردتها أزهرى محمد على، القدال عليه رحمة من الله
*يقال إن الشعراء اليوم يكتبون مالا يشعرون وينظمون الكلمات فقط؟
-والله موجود كلا الصنفين لكن الشعر والفنون عموما لو ما اتوجد فيها الإحساس ما بتصل المعلومه او الهدف بالوجه المطلوب
*ما الفرق بين الشاعر والكاتب؟
-كلاهم عندو فكر بوصلو بكتابتهُ لكن للشعر ضوابط وموازين لابد منها (قوافي وبحور) وسلاسه وجرس المفردات مع بعضها البعض
* هل البادية او الريف لها تأثير على شاعريتك؟
-بكل تأكييد زي ما بيقولوا ( الشاعر إبن بيئته ) يعني تلقائياً بتتأثر بمفردات وتقاليد مجتمعك العشت فيه بكل التفاصيل المن حولك
* هل للمكان اشرعة تحدد سر قوافيك؟
-اكييد لكن معظم كتاباتي عن طريق مواقف أو إحساس داخلى ( حب، خذلان، وغيرو ) فالمكان مهم لكن ما شديد ممكن أكتب في المواصلات أو مكان عام
* هل تعتمد الالقاء في نشر قصيدتك ام وسائل التواصل؟
-بميل لوسائل التواصل الإجتماعي لانو بتوصل لآكبر عدد ممكن وما بيسعها زمان أو مكان لكن برضو الإلقاء بوصل الفكره أو المضمون بالصوره الآمثل
* اين تضع نفسك بين شعراء السودان؟
-كلمة شاعر كبيره شويه على لكن إن شاء الله من ضمن شعراء الشعر الحديث ( القصائد )
* كيف تجد الشاعر السوداني وسط شعراء العرب؟
-اكيدالشاعر السوداني ليه مكان مرموقه جداً بينهم، لفصاحته وبلاغته وخير مثال أستاذتنا وفخرنا روضه الحاج وهي تمثل السودان خير تمثيل
* هل هناك وقت محدد للكتابة ام كل الاوقات متاحة لـ(الطاهر محمد احمد التاي) للكتابة؟
-أبداً ، ما عندي وقت محدد متى ما دعاني إحساسي إنو أكتب ما على القلم إلا أن يستجيب لكن لابد من الهدوء
* ماهي ابرز المعوقات التي تلاحق الشاعر ؟
-خوفه من عدم تقبل المجتمع له وأن لا يضيف شيئاً ملموساً
* هل تخشى النقاد؟
-أبداً لكن يا ريت النقد يكون بنّاء وما يكسر المجاديف وكل زول عندو رساله بوصلها بطريقتو والشاعر زي اي زول بخطى وبصيب
*متى ستصدر ديوان.. وما اسمه؟
-والله لسه م بديت لكن قريب إن شاء الله
*مشاريعك القادمه؟
-قصائد غنائيه للوطن بإذن الله
*اعطنا شيئا من قصائدك؟
-بعشق تُرابك يا وطن
بهواك على رغم المحن
بهواك وإن طال الغياب
بهواك في كل الزمن
بعشق هواك وأتنفسو
ينفض غباراً من سنين
يشرح صدرونا ونكتفي
ويملانا بالحب والحنين
بهواهو نِيلك ما نـضِب
يسقينا من ماهُو العذِب
شاملنا بي كرمو ويجود
يروي الأرض ريْ مو لعب
تروا وتبتق خُضرتا
تِتْجلٌى في أبهى الصور
تغمرنا من خيرا الـوفير
نزرع نخضٓر للبُّور
ماشيتنا تَطرب وبتجُود
تكفينا والخير يوت يسِود
نشبع نصدر للدول
إنتاج يفوق كل الحدود
يلاّك خِلّى على الزرع
سيب العناد سيب الجمود
مين قال أرضنا بتنضرع
يلاك قوم ما تكون جحود
*مجادعة بينك وبين شخص؟
– ايوا في
برسل شوقي لي السمحه وفريعها آتنّاا
شوقاً شايلو في جواي قرّب علينا آجلناا
يا ستي المجافيه قلبك عليْ ما حنّاا
بُعدك مني قاسي ووصلك لي جنّاا
ردت:
حبااب سيد ريدي برسل شوقي ثم حروفي
بعدك كااوي هاارد لي قليبي وجووفي
ريدك في جوااي يا نور عيوني وشووفي
هو سبب سعادتي وبعدك مني أكبر خووفي
قلت:
ليه يااا غاليه ليه صادّه وقاطعه أخبارك
مااك عارفاهو في بُعدك دمارنا ماهو دمارك
عليك غنيت يا الدّره و كبير مقدارك
راجي بس إشااره و بوصل أبووك و دَارك
ردت:
في محياك دوام غارق قليبي وجنّا
كيف أنسااك ومستوطن دواخلى محنّا
بسأل ربي نِتلما و نعيش كما نتمنّا
تسلم لي روحي ويتحقق مـُنانا و أمـلنا
قلت:
من بعدك خلاص فاض الحنين وأشواقي
ساهرت الليالي و جفت المنام أمياقي
تسلمي لي ستي قادر ربنا السوواكي
سمحه رزينه رايقه ومن الخصال أعطاكي
ردت:
حبك يا الحبيب سالبني دون إراده
ياااكْ دُنياي و بهجه عميري و زاده
مُدمنه ليه لُقياااك ووصلك أصبح عااده
كيف أنساهو ريدك وذكرتك معتاده
كل الحاصل آآآ المحبوب وقاطع أخباري
تلفوني السّرق هو سبب آذاي و ودماري
شالوا الخايب المن المكارم خالي
ضارب لي إيدي ياخ دا شَلْ أفكااري
قلت:
٩طويــله يا المّن شِيم الرجال مُتـعري
يا بااطل وخايب ورا الحراام مُنجري
بسأل ربي تَتعسو وأصلو ما تَنسّرو
تتكسر إيديكم و على الآرض تنجرّو
تلقاهو صحه عافيه إلا يوت مُحتال
إن قال خير بإيديه بـهِدّاا جبال
متعافى الجسد إلّا شاتم الحال
ما شاكر لـِنعمة ربّنا المُّتعال
٩طويــله يااااك إنت فقري و شووم
يا العّدمان شهامه كيف بتلاحق الحروم؟؟
تقضيه ليلك ونهارك بالشوارع حُووم
ما عِرفت الفّرض لا صلاة لا صووم
بعد ما نـَشل أصبح ضرب وجروح
بعد ما كنت بتشيل للنقود وتروح
بقيت لدم البشر بتسوح
سؤالي ليك أرجوك أسرع بووح
قول لي يااخ كيفن بتقتل روح؟؟
رغم أخلاقنا و مليانين رُجوله كرامه
ليه يا أخواني ليه على الغلط نِتعامه
مفروض تاني نتضافر يا الآصول وشهامه
نكسح لــيه نـملاهم حُسور و نداامه
*كلمة اخيرة؟
-والله سعيد كل السعادة على الحوار الجميل اللطيف وإن شاء الله أكون قدمت إضافه حقيقيه لبرنامجكم وشاكر جداً ليكم موقع (حدقات نيوز)
