صراحة إذا الواحد بفرح بي شي ما عارفو يبقى وصل مرحلة بعيدة جداً جداً من البؤس ..
معقولة زول يفرح عشان قالوا ليو يلا قوم أفرح ؟!!
سااااي كده بس !!
أغلب الناس دي بعد استلم إبن عوف قالوا ليهم يلا أزعلوا .. زعلوا ..
جبنا البرهان يلا أفرحوا .. فرحوا ..
فضوا الإعتصام يلا أزعلوا .. زعلوا ..
مجلس سيادي بصلاحيات تشريفية يلا أفرحوا .. فرحوا ..
المجلس العسكري بتعابط في التفاوض يلا أزعلوا .. زعلوا ..
جبنا ليكم حمدوك يلا أفرحوا .. فرحوا ..
الشق العسكري ما مخلينا نشتغل يلا أزعلوا .. زعلوا..
حكومة كفاءات بدون محاصصات حزبية يلا أفرحوا .. فرحوا ..
مدير عام الشرطة بدقنا يلا أزعلوا .. زعلوا ..
جبنا مدير عام شرطة جديد يلا أفرحوا .. فرحوا ..
الولاة المدنيين لازم نتمهم يلا أزعلوا لينا عشان نجيبهم ليكم .. زعلوا ..
جبناهم يلا أفرحوا .. فرحوا ..
نقتلكم ونغطس حجركم بس أعفوا لينا كلو عشان نعمل ليكم سلام يلا أزعلوا شديييد بنعملوا ليكم .. زعلوا ..
وقعنا إتفاقية سلام يلا أفرحوا .. ييييي فرحنا والسلام حصل خلاص ، ألف مبروك ، مبروك والله ، الله يسلمك ، الله يبارك فيك يتربى في عزكم إن شاء الله .
لا في زول بسأل ليه !! ولا كيف !! ولا لي شنو !!
ولا منو !! ولا في أي شي
ناس مغمضة سااااي يزعلوهم ويفرحوهم زعل وفرح وهمي ساي ..
ولا حول ولا قوة إلا بالله ..
إن الشعوب التي تنشأ في مهد الإستبداد ، وتساس بالظلم والإضطهاد ، تفسد أخلاقها ، وتذل نفوسها ، ويذهب بأسها ، وتضرب عليها الذلة والمسكنة ، وتألف الخضوع ، وتأنس بالمهانة والخنوع ، وإذا طال عليها أمد الظلم تصير هذه الأخلاق موروثة ومكتسبة ، حتى تكون كالغرائز الفطرية ، والطبائع الخلقية ، إذا أخرجت صاحبها من بيئتها ألفيته ينزع بطبعه إليها ، ويتفلت منك ليقتحم فيها ، وهذا شأن البشر في كل ما يألفونه ويجرون عليه من خير وشر ، وإيمان وكفر ..
وهذا الشعب يستحق ما يُفعل به .. فهو الذي ارتضى ذلك بكامل إرادته وأبى إلا أن يرى الدنيا بعيون تجمع المهنيين وقحت وحمدوك ..